[PTS Vol S - 2] [\z S /] [\f II /]
[BJT Vol S - 2] [\z S /] [\w II /]
[PTS Page 249] [\q 249/]
[BJT Page 382] [\x 382/]

Suttantapiṭake
Saṃyuttanikāyo
Dutiyo bhāgo
Nidānavaggo
6. Rāhulasaṃyuttaṃ
2. Dutiyo vaggo

Namo tassa bhagavato arahato sammāsambuddhassa

 

6. 2. 1.

Cakkhuādisuttaṃ

350. Evaṃ me sutaṃ: ekaṃ samayaṃ bhagavā sāvatthiyaṃ viharati jetavane anāthapiṇḍikassa ārame. [PTS Page 250] [\q 250/] atha kho āyasmā rāhulo yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ rāhulaṃ bhagavā etadavoca:

Taṃ kimmaññasi rāhula, cakkhuṃ niccaṃ vā aniccaṃ vā'ti? 'Aniccaṃ bhante'. Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante.' Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti. No hetaṃ bhante. '

Sotaṃ niccaṃ vā aniccaṃ vā'ti? 'Aniccaṃ bhante'. Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante'. Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti ' no hetaṃ bhante'.

Ghāṇaṃ niccaṃ vā aniccaṃ vā'ti? 'Aniccaṃ bhante'. Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante'. Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti ' no hetaṃ bhante'.

Jivhā niccā vā aniccā vā'ti? 'Aniccā bhante'. Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante'. Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti ' no hetaṃ bhante'.

Kāyo nicco vā anicco vā'ti? 'Anicco bhante'. Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante'. Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti ' no hetaṃ bhante'.

Mano nicco vā anicco vā'ti? 'Anicco bhante'. Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante'. Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti ' no hetaṃ bhante'.

Evaṃ passaṃ rāhula, sutavā ariyasāvako cakkhusmimpi nibbindati, sotasmimpi nibbindati, ghāṇasmimpi nibbindati, jivhāya'pi nibbindati, kāyasmimpi nibbindati, manasmimpi nibbindati, nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānātī'ti.

 

 6. 2. 2.

Rūpādisuttaṃ

351. Sāvatthiyaṃ -

Taṃ kimmaññasi rāhula, rūpā niccā vā aniccā vā'ti? 'Aniccā bhante.' Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante.' Yaṃ panāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti ' no hetaṃ bhante'.

Saddā niccā vā aniccā vā'ti? 'Aniccā bhante.' Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante.' Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti 'no hetaṃ bhante'.

Gandhā niccā vā aniccā vā'ti? 'Aniccā bhante.' Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante.' Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti 'no hetaṃ bhante'.

Rasā niccā vā aniccā vā'ti? 'Aniccā bhante.' Yaṃ panāniccaṃ dukkhaṃ vā taṃ sukhaṃ vā'ti? 'Dukkhaṃ bhante.' Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, eso me attā"ti 'no hetaṃ bhante'.

Phoṭṭhabbā niccā vā aniccā vā'ti? 'Aniccā bhante.' Yaṃ panāniccaṃ dukkhaṃ vā taṃ sukhaṃ sukhaṃ vā'ti? 'Dukkhaṃ bhante.' Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, e so me attā"ti 'no hetaṃ bhante'.

Dhammā niccā vā aniccā vā'ti? 'Aniccā bhante.' Yaṃ panāniccaṃ dukkhaṃ vā taṃ sukhaṃ sukhaṃ vā'ti? 'Dukkhaṃ bhante.' Yaṃ panāniccaṃ dukkhaṃ vipariṇāmadhammaṃ kallannu taṃ samanupassituṃ "etaṃ mama, esohamasmi, e so me attā"ti 'no hetaṃ bhante'.

Evaṃ passaṃ rāhula, sutavā ariyasāvako rūpesu'pi nibbindati, saddesu'pi nibbindati, gandhesu'pi nibbindati, rasesu'pi nibbindati, phoṭṭhabbesu'pi nibbindati, dhammesu'pi nibbindati. Nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. Khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyāti pajānātī'ti.

 

6. 2. 3.

Viññāṇasuttaṃ

352. Sāvatthiyaṃ -

Taṃ kimmaññasi rāhula, cakkhuviññāṇaṃ niccaṃ vā aniccaṃ vā'ti? Aniccaṃ bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Sotaviññāṇaṃ niccaṃ vā aniccaṃ vā'ti? Aniccaṃ bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Ghāṇaviññāṇaṃ niccaṃ vā aniccaṃ vā'ti? Aniccaṃ bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Jivhāviññāṇaṃ niccaṃ vā aniccaṃ vā'ti? Aniccaṃ bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Kāyaviññāṇaṃ niccaṃ vā aniccaṃ vā'ti? Aniccaṃ bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Manoviññāṇaṃ niccaṃ vā aniccaṃ vā'ti? Aniccaṃ bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Evaṃ passaṃ rāhula, sutavā ariyasāvako cakkhuviññāṇasmimpi nibbindati, sotaviññāṇasmimpi nibbindati, ghāṇaviññāṇasmimpi nibbindati, jivhāviññāṇasmimpi nibbindati, kāyaviññāṇasmimpi nibbindati, manoviññāṇasmimpi nibbindati. Nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. 'Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānātī'ti.

[BJT Page 384] [\x 384/]

 

6. 2. 4.

Samphassasuttaṃ

353. Sāvatthiyaṃ -

Taṃ kimmaññasi rāhula cakkhusamphasso nicco vā anicco vā'ti? Anicco bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Sotasamphasso nicco vā anicco vā'ti? Anicco bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Ghāṇasamphasso nicco vā anicco vā'ti? Anicco bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Jivhāsamphasso nicco vā anicco vā'ti? Anicco bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Kāyasamphasso nicco vā anicco vā'ti? Anicco bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Manosamphasso nicco vā anicco vā'ti anicco bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Evaṃ passaṃ rāhula, sutavā ariyasāvako cakkhusamphassamimpi nibbindati, sotasamphassamimpi nibbindati, ghāṇasamphassamimpi nibbindati, jivhāsamphassamimpi nibbindati, kāyasamphassamimpi nibbindati, manosamphassamimpi nibbindati. Nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. 'Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānātī'ti.

 

6. 2. 5.

Vedanāsuttaṃ

354. Sāvatthiyaṃ -

Taṃ kimmaññasi rāhula, cakkhusamphassajā vedanā niccā vā aniccā vā'ti? Aniccā bhante yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Sotasamphassajā vedanā niccā vā aniccā vā'ti? Aniccā bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Ghāṇasamphassajā vedanā niccā vā aniccā vā'ti? Aniccā bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Jivhāsamphassajā vedanā niccā vā aniccā vā'ti? Aniccā bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Kāyasamphassajā vedanā niccā vā aniccā vā'ti? Aniccā bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Manosamphassajā vedanā niccā vā aniccā vā'ti? Aniccā bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Evaṃ passaṃ rāhula, sutavā āriyasāvako cakkhusamphassajāya vedanāya'pi nibbindati. Sotasamphassajāya vedanāya'pi nibbindati. Ghāṇasamphassajāya vedanāya'pi nibbindati. Jivhāsamphassajāya vedanāya'pi nibbindati. Kāyasamphassajāya vedanāya'pi nibbindati. Manosamphassajāya vedanāya'pi nibbindati. Nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. 'Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānātī'ti.

 

6. 2. 6.

Saññāsuttaṃ

355. Sāvatthiyaṃ -

Taṃ kimmaññasi rāhula, rūpasaññā niccā vā aniccā vā'ti? Aniccā bhante, yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhamamaṃ, kallannu taṃ samanupassituṃ "etaṃ mama, esomahasmi, eso me attā"ti? No hetaṃ bhante.

Saddasaññā niccā vā aniccā vā'ti? Aniccaṃ bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Gandhasaññā niccā vā aniccā vā'ti? Aniccaṃ bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Rasasaññā niccā vā aniccā vā'ti? Aniccaṃ bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Phoṭṭhabbasaññā niccā vā aniccā vā'ti? Aniccaṃ bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Dhammasaññā niccā vā aniccā vā'ti? Aniccaṃ bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Evaṃ passaṃ rāhula, sutavā ariyasāvako rūpasaññāya'pi nibbindati. Saddasaññāya'pi nibbindati. Gandhasaññāya'pi nibbindati. Rasasaññāya'pi nibbindati. Phoṭṭhabbasaññāya'pi nibbindati. Dhammasaññāya'pi nibbindati. Nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. 'Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānātī'ti.

 

6. 2. 7.

Sañcetanāsuttaṃ

356. Sāvatthiyaṃ -

Taṃ kimmaññasi rāhula, rūpasañcetanā niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Saddasañcetanā niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Gandhasañcetanā niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Rasasañcetanā niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Phoṭṭhabbasañcetanā niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Dhammasañcetanā niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Evaṃ passaṃ rāhula, sutavā ariyasāvako rūpasañcetanāya'pi nibbindati. Saddasañcetanāya'pi nibbindati. Gandhasañcetanāya'pi nibbindati. Rasasañcetanāya'pi nibbindati. Phoṭṭhabbasañcetanāya'pi nibbindati. Dhammasañcetanāya'pi nibbindati. Nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. 'Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānātī'ti.

 

6. 2. 8.

Taṇhāsuttaṃ

357. Sāvatthiyaṃ -

Taṃ kimmaññasi rāhula, rūpataṇhā niccā vā aniccā vā'ti? 'Aniccā bhante.' Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Saddataṇhā niccā vā aniccā vā'ti? 'Aniccā bhante.' Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Gandhataṇhā niccā vā aniccā vā'ti? 'Aniccā bhante.' Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Rasataṇhā niccā vā aniccā vā'ti? 'Aniccā bhante.' Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassitu "etaṃ mama, esohamasmi, eso me attā"ti? No hetaṃ bhante.

Phoṭṭhabbataṇhā niccā vā aniccā vā'ti? 'Aniccā bhante.' Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Dhammataṇhā niccā vā aniccā vā'ti? 'Aniccā bhante.' Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Evaṃ passaṃ rāhula, sutavā ariyasāvako rūpataṇhāya'pi nibbindati, saddataṇhāya'pi nibbindati, gandhataṇhāya'pi nibbindati, rasataṇhāya'pi nibbindati, phoṭṭhabbataṇhāya'pi nibbindati, dhammataṇhāya'pi nibbindati, nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. 'Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānātī'ti.

 

6. 2. 9.

Dhātusuttaṃ

358. Sāvatthiyaṃ -

Taṃ kimmaññasi rāhula, paṭhavidhātu niccā vā aniccā vā'ti? 'Aniccā bhante.' Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Āpodhātu niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Tejodhātu niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Vāyodhātu niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Ākāsadhātu niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Viññāṇadhātu niccā vā aniccā vā'ti? Aniccā bhante. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Evaṃ passaṃ rāhula, sutavā ariyasāvako paṭhavīdhātuyā'pi nibbindati, āpodhātuyā'pi nibbindati, tojodhātuyā'pi nibbindati, vāyodhātuyā'pi nibbindati, ākāsadhātuyā'pi nibbindati, viññāṇadhātuyā'pi nibbindati, nibbindaṃ virajjati. Virāgā vimuccati. Vimuttasmiṃ vimuttamiti ñāṇaṃ hoti. 'Khīṇā jāti. Vusitaṃ brahmacariyaṃ. Kataṃ karaṇīyaṃ. Nāparaṃ itthattāyāti pajānātī'ti.

[BJT Page 386] [\x 386/]

 

6. 2. 10.

Bandhasuttaṃ

359. Sāvatthiyaṃ -

Taṃ kimmaññasi rāhula, [PTS Page 252] [\q 252/] rūpaṃ niccaṃ vā aniccaṃ vā'ti? 'Aniccaṃ bhante'. Yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Vedanā niccā vā aniccā vā'ti? 'Aniccā bhante' yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Saññā niccā vā aniccā vā'ti? 'Aniccā bhante' yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Saṅkhārā niccā vā aniccā vā'ti? 'Aniccā bhante' yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Viññāṇaṃ niccā vā aniccā vā'ti? 'Aniccā bhante' yampanāniccaṃ dukkhaṃ vā taṃ sukhaṃ vā'ti? Dukkhaṃ bhante. Yampanāniccaṃ dukkhaṃ vipariṇāmadhammaṃ, kallannu taṃ samanupassituṃ "etaṃ mama, esohamasmi, eso me attā"ti? No hetaṃ bhante.

Evaṃ passaṃ rāhula, sutavā ariyasāvako rūpasmimpi nibbindati, vedanāya'pi nibbindati, saññāya'pi nibbindati, saṅkhāresu'pi nibbindati, viññāṇasmimpi nibbindati. Nibbindaṃ virajjati. Virāgā vimuccati, vimuttasmiṃ vimuttamiti ñāṇaṃ hoti. 'Khīṇā jāti. Vusitaṃ brahmacariyaṃ. Kataṃ karaṇīyaṃ. Nāparaṃ itthattāyāti pajānātī'ti.

 

6. 2. 11.

Mānānusayasuttaṃ

360. Sāvatthiyaṃ -

Atha kho āyasmā rāhulo yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā rāhulo bhagavantaṃ etadavoca:

"Kathannu kho bhante, jānato, kathaṃ passato imasmiñca saviññāṇake kāye bahiddhā ca sabbanimittesu ahiṃkāramamiṃkāramānānusayā1 na hontī? Ti. "

Yaṃ kiñci rāhula, rūpaṃ atītānāgatapaccuppannaṃ ajjhattaṃ vā bahiddhā vā olārikaṃ vā sukhumaṃ vā hīnaṃ vā paṇītaṃ vā yaṃ dūre santike vā - sabbaṃ rūpaṃ "netaṃ mama, nesohamasmi, na me so attā"ti evametaṃ yathābhūtaṃ sammappaññāya passati.

Yā kāci vedanā atītānāgatapaccuppannaṃ ajjhattaṃ vā bahiddhā vā olārikā vā sukhumā vā hīnā vā paṇītā vā yaṃ dūre santike vā sabbe vedanā "netaṃ mama, nesohamasmi, na meso attā"ti evametaṃ yathābhūtaṃ sammappaññāya passati.

Yā kāci saññā atītānāgatapaccuppannaṃ ajjhattaṃ vā bahiddhā vā olārikā vā sukhumā vā hīnā vā paṇītā vā yaṃ dūre santike vā sabbe saññā "netaṃ mama, nesohamasmi, na meso attā"ti evametaṃ yathābhūtaṃ sammappaññāya passati.

Ye keci saṅkhārā atītānāgatapaccuppannaṃ ajjhattaṃ vā bahiddhā vā olārikā vā sukhumā vā hīnā vā paṇītā vā yaṃ dūre santike vā sabbe saṅkhārā "netaṃ mama, nesohamasmi, na me so attā"ti evametaṃ yathābhūtaṃ sammappaññāya passati.

Yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā olārikaṃ vā sukhumaṃ vā hīnaṃ vā paṇītaṃ vā yaṃ dūre santike vā sabbaṃ viññāṇaṃ "netaṃ mama, nesohamasmi, na me so attā"ti evametaṃ yathābhūtaṃ sammappaññāya passati.

Evaṃ kho rāhula, jānato evaṃ passato imasmiñca saviññāṇake kāye bahiddhā ca sabbanimittesu ahiṃkāramamiṃkāramānānusayā na hontī'ti.

 

6. 2. 12.

Mānāpagatasuttaṃ

361. [PTS Page 253] [\q 253/] sāvatthiyaṃ -

Atha kho āyasmā rāhulo yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā rāhulo bhagavantaṃ etadavoca: "kathannu kho bhante, jānato kathaṃ passato imasmiñca saviññāṇake kāye bahiddhā ca sabbanimittesu ahiṃkāramamiṃkāramānāpagataṃ mānasaṃ hoti, vidhāsamatikkantaṃ santaṃ suvimutta"nti?

------------------------

1. Ahaṃkāra mamaṃkāramānānusayā - machasaṃ, syā, [PTS] sī 1, 2

[BJT Page 388] [\x 388/]

Yaṃ kiñci rāhula, rūpaṃ atītānāgatapaccuppannaṃ ajjhattaṃ vā bahiddhā vā olārikaṃ vā sukhumaṃ vā hīnaṃ vā paṇītaṃ vā, yaṃ dūre santike vā sabbanda rūpaṃ "netaṃ mama, nesohamasmi, na meso attā"ti evametaṃ yathābhūtaṃ sammappaññāya disvā anupādāvimutto hoti.

Yā kāci vedanā atītānāgatapaccuppannaṃ ajjhattaṃ vā bahiddhā vā olārikā vā sukhumā vā hīnā vā paṇītā vā, yaṃ dūre santike vā - sabbe vedanā "netaṃ mama, nesohamasmi, na meso attā"ti. Evametaṃ yathābhūtaṃ sammappaññāya disvā anupādāvimutto hoti.

Yā kāci saññā atītānāgatapaccuppannaṃ ajjhattaṃ vā bahiddhā vā olārikā vā sukhumā vā hīnā vā paṇītā vā, yaṃ dūre santike vā - sabbe saññā "netaṃ mama, nesohamasmi, na meso attā"ti. Evametaṃ yathābhūtaṃ sammappaññāya disvā anupādāvimutto hoti.

Ye keci saṅkhārā atītānāgatapaccuppannaṃ ajjhattaṃ vā bahiddhā vā olārikā vā sukhumā vā hīnā vā paṇītā vā, yaṃ dūre santike vā - sabbe saṅkhārā "netaṃ mama, nesohamasmi, na me so attā"ti. Evametaṃ yathābhūtaṃ sammappaññāya disvā anupādāvimutto hoti.

Yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā olārikaṃ vā sukhumaṃ vā hīnaṃ vā paṇītaṃ vā, yaṃ dūre santike vā - sabbaṃ viññāṇaṃ "netaṃ mama, nesohamasmi, na me so attā"ti. Evametaṃ yathābhūtaṃ sammappaññāya disvā anupādāvimutto hoti.

Evaṃ kho rāhula, jānato evaṃ passato imasmiñca saviññāṇake kāye, bahiddhā ca sabbanimittesu ahiṅkhāramamiṅkhāramānāpagataṃ mānasaṃ hoti vidhāsamatikkantaṃ santaṃ suvimuttanti.

Vaggo dutiyo.

Tassuddānaṃ:

[PTS Page 254] [\q 254/] cakkhuṃ rūpañca viññāṇaṃ samaphasso vedanāya ca,

Saññā sañcetanā taṇhā dhātu khandhena te dasa

Anusayaṃ apagatañceva vaggo tena pavuccatī'ti

Rāhulasaṃyuttaṃ samattaṃ.