Suttantapiṭake
Aṅguttaranikāyo
2. Dukanipāto
Tatiyo paṇṇāsako
Namo tassa bhagavato arahato sammāsambuddhassa
11. Āsāvaggo

(Sāvatthinidānaṃ:)
2. 3. 11. 1.
1. Dvemā bhikkhave āsā duppajahā. Katamā dve: lābhāsā ca, jīvitāsā ca. Imā kho bhikkhave dve āsā duppajahāti.
[PTS Page 087]

2. 3. 11. 2.
2. Dveme bhikkhave puggalā dullabhā lokasmiṃ. Katame dve: yo ca pubbakārī, yo ca kataññū katavedī. Ime kho bhikkhave dve puggalā dullabhā lokasminti.(1)

2. 3. 11. 3.
Dveme bhikkhave puggalā dullabhā lokasmiṃ. Katame dve: titto ca, tappetā ca. Ime kho bhikkhave dve puggalā dullabhā lokasminti.(2)

2. 3. 11. 4.
4. Dveme bhikkhave puggalā duttappayā. Katame dve: yo ca laddhaṃ laddhaṃ nikkhipati, yo ca laddhaṃ laddhaṃ vissajjeti. Ime kho bhikkhave dve puggalā duttappayāti.

2. 3. 11. 5.
5. Dveme bhikkhave puggalā sutappayā. Katame dve: yo ca laddhaṃ laddhaṃ na nikkhipati, yo ca laddhaṃ laddhaṃ na vissajjeti. Ime kho bhikkhave dve puggalā sutappayāti.

-------------

1. Vaḍḍhantīti-machasaṃ, syā 2. Lokasmintīti-machasaṃ

[BJT Page 170.]

2. 3. 11. 6.
6. Dveme bhikkhave paccayā rāgassa uppādāya. Katame dve: subhanimittañca, ayoniso ca manasikāro. Ime kho bhikkhave dve paccayā rāgassa uppādāya.

2. 3. 11. 7.
7. Dveme bhikkhave paccayā dosassa uppādāya. Katame dve: paṭighanimittañca, ayoniso ca manasikāro. Ime kho bhikkhave dve paccayā dosassa uppādāya.

2. 3. 11. 8.
8. Dveme bhikkhave paccayā micchādiṭṭhiyā uppādāya. Katame dve: parato ca ghoso, ayoniso ca manasikāro. Ime kho bhikkhave dve paccayā micchādiṭṭhiyā uppādāya.

2. 3. 11. 9.
9. Dveme bhikkhave paccayā sammādiṭṭhiyā uppādāya. Katame dve: parato ca ghoso, yoniso ca manasikāro. Ime kho bhikkhave dve paccayā sammādiṭṭhiyā uppādāya.(3)

2. 3. 11. 10.
10 Dvemā bhikkhave āpattiyo. Katamā dve: [PTS Page 088] lahukā ca āpatti, garukā ca āpatti. Imā kho bhikkhave dve āpattiyo.(4)

2. 3. 11. 11.
11. Dvemā bhikkhave āpattiyo. Katamā dve: duṭṭhullā ca āpatti, aduṭṭhullā ca āpatti. Imā kho bhikkhave dve āpattiyo.(5)

2. 3. 11. 12.
12. Dvemā bhikkhave āpattiyo. Katamā dve: sāvasesā ca āpatti, anavasesā ca āpatti. Imā kho bhikkhave dve āpattiyoti.

Vaggo ekādasamo(6)

1.
[BJTS] = lokasminti. + 2. Lokasmintīti-machasaṃ
[ChS]=
[PTS] =
[Thai] =
[Kambodian] =

2.
[BJTS] = lokasminti. + 2. Lokasmintīti-machasaṃ
[ChS]=
[PTS] =
[Thai] =
[Kambodian] =

3.
[BJTS] = uppādāya. + 1.Uppādāyāti-machasaṃ.
[ChS]=
[PTS] =
[Thai] =
[Kambodian] =

4.
[BJTS] = āpattiyo + 2. Āpattiyoti-machasaṃ.
[ChS]=
[PTS] =
[Thai] =
[Kambodian] =

5.
[BJTS] = āpattiyo + 2. Āpattiyoti-machasaṃ.
[ChS]=
[PTS] =
[Thai] =
[Kambodian] =

6.
[BJTS] =Vaggo ekādasamo + 3. Āsāduppajahavaggo paṭhamo-machasaṃ.
[ChS]=
[PTS] =
[Thai] =
[Kambodian] =