[BJT Page 440]

Suttantapiṭake
Aṅguttaranikāyo
Navakanipāto
Paṭhamo paṇṇāsako
3. Sattāvāsavaggo

Namo tassa bhagavato arahato sammāsambuddhassa.

9. 1. 3. 1

Ṭhāna suttaṃ

(Sāvatthinidānaṃ)

Tīhi bhikkhave, ṭhānehi uttarakurukā manussā deve ca tāvatiṃse adhigaṇhanti1 jambudīpike ca manusse. Katamehi tīhi:

Amamā apariggahā, niyatāyukā, visesabhuno. 1 Imehi kho bhikkhave, tīhi ṭhānehi uttarakurukā manussā deve ca tāvatiṃse adhigaṇhanti jambudīpike ca manusse.

Tīhi bhikkhave, ṭhānehi devā tāvatiṃsā uttarakuruke ca manusse adhigaṇhanti jambudīpike ca manusse katamehi tīhi:

Dibbena āyunā, dibbena vaṇṇena, dibbena sukhena, imehi kho bhikkhave, tīhi ṭhānehi devā tāvatiṃsā uttarakuruke ca manusse adhigaṇhanti jambudīpike ca manusse.

Tīhi bhikkhave, ṭhānehi jambudīpikā manussā uttarakuruke ca manusse adhigaṇhanti deve ca tāvatiṃse. Katamehi tīhi:

Sūrā, satimanto, idha brahmacariyavāso. Imehi kho bhikkhave, tīhi ṭhānehi jambudīpikā manussā uttarakuruke ca manusse adhigaṇhanti deve ca tāvatiṃseti.

9. 1. 3. 2

Khaluṅka suttaṃ

(Sāvatthinidānaṃ)

Tayo [PTS Page 397] ca bhikkhave, assakhaluṅke desissāmi tayo ca purisakhaluṅke, tayo ca assasadasse2 tayo ca purisasadasse3 tayo ca bhadre assājānīye tayo ca bhadre purisājānīye. Taṃ suṇātha, sādhukaṃ manasikarotha, bhāsissāmīti.

1. Visesaguṇā machasaṃ

2. Assaparasse machasaṃ

3. Purisaparasse machasaṃ

4. Bhadde machasaṃ

[BJT Page 442]

Evaṃ bhanteti kho te bhikkhū bhagavato paccassosuṃ bhagavā etadavoca:

Katame ca bhikkhave, tayo assakhaluṅkā:

Idha bhikkhave, ekacco assakhaluṅko javasampanno ca hoti, na vaṇṇasampanno, na ārohapariṇāha sampanno.

Idha pana bhikkhave, ekacco, assakhaluṅko javasampanno ca hoti vaṇṇasampanno ca na ārohapariṇāha sampanno.

Idha pana bhikkhave, ekacco assakhaluṅko javasampanno ca hoti vaṇṇasampanno ca ārohapariṇāhasampanno ca. Ime kho bhikkhave tayo assakhaluṅkā.

Katame ca bhikkhave, tayo purisakhaluṅkā: idha bhikkhave, ekacco purisakhaluṅko javasampanno hoti na ca vaṇṇasampanno hoti, na ārohapariṇāha sampanno.

Idha pana bhikkhave, ekacco purisakhaluṅko javasampanno ca hoti, vaṇṇasampanno ca, na ārohapariṇāha sampanno.

Idha pana bhikkhave, ekacco purisakhaluṅko javasampanno ca hoti, vaṇṇasampanno ca, ārohapariṇāha sampanno ca.

Kathañca bhikkhave, purisakhaluṅko, javasampanno hoti na vaṇṇasampanno, na ārohapariṇāha sampanno:

Idha bhikkhave, bhikkhu 'idaṃ dukkha'nti yathābhūtaṃ pajānāti, 'ayaṃ dukkhasamudayo'ti yathābhūtaṃ pajānāti, 'ayaṃ dukkhanirodho' ti yathābhūtaṃ pajānāti 'ayaṃ dukkhanirodhagāminī paṭipadā' ti yathābhūtaṃ pajānāti. Idamassa [PTS Page 398] javasmiṃ vadāmi. Abhidhamme kho pana abhivinaye pañhaṃ puṭṭho saṃsādeti, no vissajjeti, idamassa na vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ, idamassa na ārohapariṇāhasmiṃ vadāmi. Evaṃ kho bhikkhave, purisakhaluṅko javasampanno hoti na vaṇṇasampanno, na ārohapariṇāha sampanno.

[BJT Page 444]

Kathañca bhikkhave, purisakhaluṅko javasampanno ca hoti vaṇṇasampanno ca, na ārohapariṇāha sampanno:

Idha bhikkhave, bhikkhu 'idaṃ dukkha'nti yathābhūtaṃ pajānāti, 'ayaṃ dukkhasamudayo'ti yathābhūtaṃ pajānāti, 'ayaṃ dukkhanirodho' ti yathābhūtaṃ pajānāti, 'ayaṃ dukkhanirodhagāminī paṭipadā' ti yathābhūtaṃ pajānāti. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti no saṃsādeti. Idamassa vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ, idamassa na ārohapariṇāhasmiṃ vadāmi. Evaṃ kho bhikkhave, purisakhaluṅko javasampanno ca hoti na vaṇṇa sampanno ca, na ārohapariṇāha sampanno.

Katañca bhikkhave, purisakhaluṅko java sampanno ca hoti vaṇṇasampanno ca ārohapariṇāha sampanno ca:

Idha bhikkhave, bhikkhu 'idaṃ dukkha'nti yathābhūtaṃ pajānāti, ayaṃ dukkhasamudayoti yathābhūtaṃ pajānāti, ayaṃ dukkhanirodhoti yathābhūtaṃ pajānāti, 'ayaṃ dukkhanirodhagāminī paṭipadā'ti yathābhūtaṃ pajānāti, idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti no saṃsādeti. Idamassa vaṇṇasmiṃ vadāmi. Lābhī [PTS Page 399] kho pana hoti cīvarapiṇḍapātasenāsanagilānapaccayabhesajjaparikkhārānaṃ, idamassa ārohapariṇāhasmiṃ vadāmi. Evaṃ kho bhikkhave, purisakhaluṅko javasampanno ca hoti, vaṇṇasampanno ca ārohapariṇāha sampanno ca. Ime kho bhikkhave, tayo purisakhaluṅkā.

Katame ca bhikkhave, tayo assasadassā1

Idha bhikkhave, ekacco assasadasso javasampanno ca hoti, na vaṇṇasampanno, na ārohapariṇāha sampanno.

Idha pana bhikkhave, ekacco, assasadasso javasampanno ca hoti vaṇṇasampanno ca na ārohapariṇāha sampanno.

Idha pana bhikkhave, ekacco assasadasso javasampanno ca hoti vaṇṇasampanno ca ārohapariṇāhasampanno ca. Ime kho bhikkhave tayo assasadassā.

Katame ca bhikkhave, tayo purisa sadassā: idha bhikkhave, ekacco purisasadasso javasampanno hoti na ca vaṇṇasampanno hoti, na ārohapariṇāha sampanno.

Idha pana bhikkhave, ekacco purisasadasso javasampanno ca hoti, vaṇṇasampanno ca, na ārohapariṇāha sampanno.

Idha pana bhikkhave, ekacco purisasadasso javasampanno ca hoti, vaṇṇasampanno ca, ārohapariṇāha sampanno ca.

1. Assaparassā machasaṃ

[BJT Page 446]

Kathañca bhikkhave, purisasadasso javasampanno hotā na vaṇṇasampanno, na ārohapariṇāha sampanenā:

Idha bhikkhave bhikkhu pañcannaṃ orambhāgiyānaṃ saññojanānaṃ parikkhayā opapātiko hoti tattha parinibbāyī hoti anāvattidhammo tasmā lokā idamassa javasmiṃ vadāmi. Abhidhamme kho pana abhivinaye pañhaṃ puṭṭho saṃsādeti no vissajjeti, idamassa vaṇṇasmaṃ vadāmi. Na lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ, idamassa ārohapariṇāhasmiṃ vadāmi. Evaṃ kho bhikkhave purisasadasso javasampanno hoti na vaṇṇasampanno, na ārohapariṇāhasampanno.

Kathañca bhikkhave purisasadasso javasampanno ca hoti vaṇṇasampanno ca . Na ārohapariṇāhasampanno.

Idha bhikkhave bhikkhu pañcannaṃ orambhāgiyānaṃ saññojanānaṃ parikkhayā opapātiko hoti tattha parinibbāyī hoti anāvattidhammo tasmā lokā idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti no saṃsādeti, idamassa vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ, idamassa ārohapariṇāhasmiṃ vadāmi. Evaṃ kho bhikkhave purisasadasso javasampanno hoti vaṇṇasampanno ca, na ārohapariṇāhasampanno.

Kathañca bhikkhave purisasadasso javasampanno ca hoti vaṇṇasampanno ca ārohapariṇāhasampanno ca

Idha bhikkhave, bhikkhu pañcannaṃ orambhāgiyānaṃ saññojanānaṃ parikkhayā opapātiko hoti tattha parinibbāyī hoti anāvattidhammo tasmā lokā, idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti no saṃsādeti, idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ, idamassa ārohapariṇāhasmiṃ vadāmi. Evaṃ kho bhikkhave, purisasadasso javasampanno ca hoti, vaṇṇasampanno ca ārohapariṇāhasampanno ca. Ime kho bhikkhave, tayo purisasadassā.

Katame ca bhikkhave, tayo bhadrā assājānīyā:

Idha bhikkhave, ekacco bhadro assājānīyo javasampanno hoti, na vaṇṇasampanno, na ārohapariṇāha sampanno.

Idha pana bhikkhave, ekacco bhadro assājānīyo javasampanno ca hoti vaṇṇasampanno ca na ārohapariṇāha sampanno.

Idha pana bhikkhave, ekacco bhadro assājānīyo javasampanno ca hoti vaṇṇasampanno ca ārohapariṇāhasampanno ca. Ime [PTS Page 400] kho bhikkhave tayo bhadrā assājāniyā.

Katame ca bhikkhave, tayo bhadrā purisājānīyā:

Idha bhikkhave, ekacco bhadro purisājānīyo javasampanno hoti na ca vaṇṇasampanno hoti, na ārohapariṇāha sampanno.

Idha pana bhikkhave, ekacco bhadro purisājānīyo javasampanno ca hoti, vaṇṇasampanno ca, na ārohapariṇāha sampanno.

Idha pana bhikkhave, ekacco bhadro purisājānīyo javasampanno ca hoti, vaṇṇasampanno ca, ārohapariṇāha sampanno ca.

Kathañca bhikkhave, bhadro purisājānīyo javasampanno hoti na vaṇṇasampanno, na ārohapariṇāhasampanno:

Idha bhikkhave bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idamassa javasmiṃ vadāmi. Abhidhamme kho pana abhivinaye pañhaṃ puṭṭho saṃsādeti no vissajjeti. Imassa vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho bhikkhave bhadro purisājānīyo javasampanno hoti na vaṇṇasampanno na ārohapariṇāhasampanno.

Katañca bhikkhave bhadro purisājānīyo javasampanno ca hoti, vaṇṇasampanno ca, na ārohapariṇāhasampanno.:

Idha bhikkhave bhikkhu pañcannaṃ orambhāgiyānaṃ saññojanānaṃ parikkhayā opapātiko hoti tattha parinibbāyī hoti anāvattidhammo tasmā lokā. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti no saṃsādeti. Idamassa vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho bhikkhave, bhadro purisājānīyo javasampanno hoti, vaṇṇasampanno ca, na ārohapariṇāhasampanno.

Kathañca bhikkhave bhadro purisājānīyo javasampanno ca hoti vaṇṇasampanno ca ārohapariṇāhasampanno ca

Idha bhikkhave bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti, idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ, idamassa ārohapariṇāhasmiṃ vadāmi.

Evaṃ kho bhikkhave, bhadro purisajānīyo javasampanno ca hoti vaṇṇasampanno ca ārohapariṇāha sampanno ca. Ime kho bhikkhave, tayo bhadrā purisājānīyāti.

[BJT Page 448]

9. 1. 3. 3

Taṇhāmūlaka suttaṃ

(Sāvatthinidānaṃ)

Nava bhikkhave, taṇhāmūlake dhamme desessāmi. Taṃ suṇātha, sādhukaṃ manasikarotha, bhāsissāmīti. Evaṃ bhante ti kho te bhikkhū bhagavato paccassosuṃ. Bhagavā etadavoca:

Katame ca bhikkhave, nava taṇhāmūlakā dhammā? Taṇhaṃ paṭicca pariyesanā. Pariyesanaṃ paṭicca lābho, lābhaṃ paṭicca vinicchayo vinicchayaṃ paṭicca chandarāgo, chandarāgaṃ paṭicca ajjhosānaṃ, ajjhosānaṃ paṭicca pariggaho pariggahaṃ paṭicca macchariyaṃ, macchariyaṃ paṭicca ārakkhā, ārakkhādhikaraṇaṃ daṇḍādānasatthādāna1 [PTS Page 401] kalaha viggaha vivādā2 tuvaṃtuvapesuññamusāvādā aneke pāpakā akusalā dhammā samabhavanti. Ime kho bhikkhave, nava taṇhāmūlakā dhammāti.

9. 1. 3. 4

Sattāvāsa suttaṃ

(Sāvatthinidānaṃ)

Nava ime bhikkhave, sattāvāsā. Katame nava:

1. Santi bhikkhave, sattā nānattakāyā nānatta saññino seyyathāpi manussā ekacce ca devā ekacce ca vinipātikā. Ayaṃ paṭhamo sattāvāso.

2. Santi bhikkhave, sattā nānattakāyā ekattasaññino seyyathāpi devā brahmakāyikā paṭhamābhinibbattā ayaṃ dutiyo sattāvāso.

3. Santi bhikkhave, sattā ekattakāyā nānattasaññino seyyathāpi devā abhassarā. Ayaṃ tatiyo sattāvāso.

4. Santi bhikkhave, sattā ekattakāyā ekattasaññino seyyathāpi devā subhakiṇhā. Ayaṃ catuttho sattāvāso.

1. Daṇḍādānaṃ satthādānaṃ machasaṃ

2. Kālahaviggaha vivāda machasaṃ

[BJT Page 450]

5. Santi bhikkhave sattā asaññino appaṭisaṃvedino, seyyathāpi devā asaññasattā. Ayaṃ pañcamo sattāvāso.

6. Santi bhikkhave sattā sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā 'ananto ākāso' ti ākāsānañcāyatanūpagā. Ayaṃ chaṭṭho sattāvāso.

7. Santi bhikkhave sattā sabbaso ākāsānañcāyatanaṃ samatikkamma 'anantaṃ viññāṇanti' viññāṇañcāyatanūpagā. Ayaṃ sattamo sattāvāso.

8. Santi bhikkhave sattā sabbaso viññāṇañcāyatanaṃ samatikkamma 'natthi kiñcī' ti ākiñcaññāyatanūpagā. Ayaṃ aṭṭhamo sattāvāso.

9. Santi bhikkhave sattā sabbaso ākiñcaññāyatanaṃ samatikkamma nevasaññānāsaññāyatanūpagā. Ayaṃ navamo sattāvāso.

Ime kho bhikkhave nava sattāvāsāti.

9. 1. 3. 5

Paññāparicita suttaṃ

(Sāvatthinidānaṃ)

Yato [PTS Page 402] kho bhikkhave bhikkhuno paññāya cittaṃ suparicitaṃ hoti, tassetaṃ bhikkhave, bhikkhuno kallaṃ vacanāya 'khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānātī ti.

Kathañca bhikkhave bhikkhuno paññāya cittaṃ suparicitaṃ hoti. Vītarāgaṃ me cittanti paññāya cittaṃ suparicitaṃ hoti. Vītadosaṃ me cittanti paññāya cittaṃ suparicitaṃ hoti, vītamohaṃ me cittanti paññāya cittaṃ suparicitaṃ hoti. Asārāgadhammaṃ1 me cittanti paññāya cittaṃ suparicitaṃ hoti. Asandosadhammaṃ me cittanti paññāya cittaṃ suparicitaṃ hoti.

1. Asarāga dhammaṃ machasaṃ

[BJT Page 452]

Asammohadhammaṃ me cittanti paññāya cittaṃ suparicitaṃ hoti anāvattidhammaṃ me cittaṃ kāmabhavāyāti paññāya cittaṃ suparicitaṃ hoti. Anāvattidhammaṃ me cittaṃ rūpabhavāyāti paññāya cittaṃ suparicitaṃ hoti. Anāvattidhammaṃ me cittaṃ arūpabhavāyāti paññāya cittaṃ suparicitaṃ hoti.

Yato kho bhikkhave bhikkhuno paññāya cittaṃ suparicitaṃ hoti, tassetaṃ bhikkhave bhikkhuno kallaṃ vacanāya khīṇā jāti, vusitaṃ brahmacariyaṃ kataṃ karaṇīyaṃ, nāparaṃ itthattāyā'ti pajānāmīti.

9. 1. 3. 6

Silāyūpopama suttaṃ

Evaṃ me sutaṃ: ekaṃ samayaṃ āyasmā ca sāriputto āyasmā ca candikāputto1 rājagahe viharani2 veḷuvane kalandakanivāpe. Tatra kho āyasmā candikāputto bhikkhū āmantesi: āvuso bhikkhavoti, āvusoti kho te bhikkhū āyasmato candikāputtassa paccassosuṃ. Āyasmā candikāputto etadavoca: "devadatto āvuso bhikkhūnaṃ evaṃ dhammaṃ deseti: yato ca3 kho āvuso bhikkhuno cetasā cittaṃ paricitaṃ hoti4 tassetaṃ bhikkhuno kallaṃ veyyākaraṇāya [PTS Page 403 ']khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyāti pajānāmīti.

Atha kho5 āyasmā sāriputto āyasmantaṃ candikāputtaṃ etadavoca: "na kho āvuso candikāputta, devadatto bhikkhūnaṃ evaṃ dhammaṃ deseti: " yato kho āvuso bhikkhuno cetasā cittaṃ paricitaṃ hoti3 tassetaṃ bhikkhuno kallaṃ veyyākaraṇāya khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmī' ti. Evañca kho āvuso candikāputta devadatto bhikkhūnaṃ dhammaṃ deseti: 'yato kho āvuso bhikkhuno cetasā cittaṃ suparicitaṃ hoti, tassetaṃ bhikkhuno kallaṃ veyyākaraṇāya 'khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmī' ti.

1. Chandikāputto sī 1.

2. Viharati machasaṃ

3. Yato kho machasaṃ

4. Cetasā vitaṃ hoti machasaṃ

5. Evaṃ vutte machasaṃ

[BJT Page 454]

Dutiyampi kho āyasmā candikāputto bhikkhū āmantesi: devadatto āvuso bhikkhūnaṃ evaṃ dhammaṃ deseti: yato kho āvuso bhikkhuno cetasā cittaṃ paricitaṃ hoti, tassetaṃ bhikkhuno kallaṃ veyyākaraṇāya 'khīṇā jāti vusitaṃ' brahmacariyaṃ kataṃ karaṇīyaṃ nāparaṃ itthattāyāti pajānāmī' ti.

Dutiyampi kho āyasmā sāriputto āyasmantaṃ candikāputtaṃ etadavoca: na kho āvuso candikāputta, devadatto bhikkhūnaṃ evaṃ dhammaṃ deseti: yato kho āvuso, bhikkhuno cetasā cittaṃ paricitaṃ hoti, tassetaṃ bhikkhuno kallaṃ veyyākaraṇāya khīṇājāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. Evañca kho āvuso candikāputta devadatto bhikkhūnaṃ dhammaṃ deseti: yato kho āvuso bhikkhuno cetasā cittaṃ suparicitaṃ hoti, tassetaṃ bhikkhuno kallaṃ veyyākaraṇāya ' khīṇā jāti vusitaṃ buhmacariyaṃ kataṃ karaṇīyaṃ nāparaṃ itthattāyāti pajānīmī 'ti.

Tatiyampi kho āyasmā candikāputto bhikkhū āmantesi: devadatto āvuso bhikkhūnaṃ evaṃ dhammaṃ deseti: yato kho āvuso bhikkhuno cetasā cittaṃ paricitaṃ hoti, tassetaṃ bhikkhuno kallaṃ veyyākaraṇāya 'khīṇā jāti vusitaṃ' brahmacariyaṃ kataṃ karaṇīyaṃ nāparaṃ itthattāyāti pajānāmī' ti.

Tatiyampi kho āyasmā sāriputto āyasmantaṃ candikāputtaṃ etadavoca: na kho āvuso candikāputta, devadatto bhikkhūnaṃ evaṃ dhammaṃ deseti: yato kho āvuso, bhikkhuno cetasā cittaṃ paricitaṃ hoti, tassetaṃ bhikkhuno kallaṃ veyyākaraṇāya khīṇājāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. Evañca kho āvuso candikāputta devadatto bhikkhūnaṃ dhammaṃ deseti: yato kho āvuso bhikkhuno cetasā cittaṃ suparicitaṃ hoti, tassetaṃ bhikkhuno kallaṃ veyyākaraṇāya 'khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmī' ti.

Kathañca āvuso bhikkhuno cetasā cittaṃ suparicitaṃ hoti: vītarāgaṃ [PTS Page 404] me cittanti cetasā cittaṃ suparicitaṃ hoti. Vītadosaṃ me cittanti cetasā cittaṃ suparicitaṃ hoti. Vītamohaṃ me cittanti cetasā cittaṃ suparicitaṃ hoti. Asārāgadhammaṃ me cittanti1. Cetasā cittaṃ suparicitaṃ hoti. Asandosadhammaṃ me cittanti2 cetasā cittaṃ suparicitaṃ hoti. Asammohadhammaṃ me cittanti3 cetasā cittaṃ suparicitaṃ hoti. Anāvattidhammaṃ me cittaṃ kāmabhavāyāti cetasā cittaṃ suparicitaṃ hoti. Anāvattidhammaṃ me cittaṃ rūpabhavāyāti cetasā cittaṃ suparicitaṃ hoti. Anāvattidhammaṃ me cittaṃ arūpabhavāyāti cetasā cittaṃ suparicitaṃ hoti.

1. Asarāgadhammaṃ me cittanti, machasaṃ

2. Asadosa dhammaṃ me cittanti, machasaṃ

3. Asamoha dhammaṃ me cittanti, machasaṃ

[BJT Page 456]

Evaṃ sammā vimuttacittassa kho āvuso bhikkhuno bhusā cepi cakkhuviññeyyā rūpā cakkhussa āpāthaṃ āgacchanti. Nevassa cittaṃ pariyādiyanti amissīkatamevassa cittaṃ hoti ṭhitaṃ āneñjappattaṃ vayañcassānupassati.

Bhusā cepi sotaviññeyyā saddā sotassa āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. Bhusā cepi ghānaviññeyyā gandhā ghānassa āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. Bhusā cepi jivhāviññeyyā rasā jivhāya āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. Bhusā cepi kāyaviññeyyā phoṭṭhabbā kāyassa āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. Bhusā cepi manoviññeyyā dhammā manassa āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. 2

Seyyathāpi āvuso silāyūpo soḷasakukkuko, tassassu aṭṭhakukku heṭṭhā nemassa aṭṭhakukku uparinemassa atha puratthimāya cepi disāya āgaccheyya bhusā vātavuṭṭhi neva naṃ kampeyya na saṅkampeyya na sampakampeyya [PTS Page 405] na sampavedheyya, atha pacchimāya cepi disāya atha pacchimāya cepi disāya āgaccheyya bhusā vātavuṭṭhi neva naṃ kampeyya na saṅkampeyya na sampavedheyya, atha uttarāya cepi disāya āgaccheyya bhusā vātavuṭṭhi neva naṃ kampeyya na saṅkampeyya na sampakampeyya na sampavedheyya, atha dakkhiṇāya cepi disāya āgaccheyya bhusā vātavuṭṭhi neva naṃ kampeyya na saṅkampeyya na sampakampeyya, taṃ kissa hetu: gambhīrattā āvuso nemassa, sunikhātattā na sampavedheyya silāyūpassa.

Evameva kho āvuso evaṃ sammā vimuttacittassa kho āvuso bhikkhuno bhusā cepi cakkhuviññeyyā rūpā cakkhussa āpāthaṃ āgacchanti. Nevassa cittaṃ pariyādiyanti amissīkatamevassa cittaṃ hoti ṭhitaṃ āneñjappattaṃ vayañcassānupassati. Bhusā cepi sotaviññeyyā saddā sotassa āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. Bhusā cepi ghānaviññeyyā gandhā ghānassa āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. Bhusā cepi jivhāviññeyyā rasā jivhāya āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. Bhusā cepi kāyaviññeyyā phoṭṭhabbā kāyassa āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati. Bhusā cepi manoviññeyyā dhammā manassa āpāthaṃ āgacchanti. Nevassa cittaṃ pariyādiyanti. Amissīkatamevassa cittaṃ hoti ṭhitaṃ āneñjappattaṃ, vayañcassānupassati.

9. 1. 3. 7

Paṭhamaverabhaya suttaṃ

(Sāvatthinidānaṃ)

Atha kho anāthapiṇḍiko gahapati yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca:

[BJT Page 458]

Yato kho gahapati ariyasāvakassa pañca bhayāni verāni vūpasantāni honti. Catūhi ca sotāpattiyaṅgehi samannāgato hoti. So ākaṅkhamāno attanāva attānaṃ byākareyya: khīṇanirayomhi khīṇatiracchānayoni khīṇapettivisayo khīṇaapāyaduggativinipāto sotāpannohamasmi avinipātadhammo niyato sambodhiparāyano1

Katamāni [PTS Page 406] pañca bhayāni verāni vūpasantāni honti:

1. Yaṃ gahapati pāṇātipātī pāṇātipātappaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedeti. Pāṇātipātā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Pāṇātipātā paṭiviratassa evaṃ taṃ bhayaṃ veraṃ vūpasantaṃ hoti.

2. Yaṃ gahapati adinnādāyī adinnādānapaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedeti. Adinnādānā paṭivirato neva diṭṭhadhammakampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Adinnādānā paṭiviratassa evaṃ taṃ bhayaṃ veraṃ vūpasantaṃ hoti.

3. Yaṃ gahapati kāmesu micchācārī kāmesu micchācārappaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedeti. Kāmesumicchācārā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Kāmesumicchācārā paṭiviratassa evaṃ taṃ bhayaṃ veraṃ vūpasantaṃ hoti.

4. Yaṃ gahapati musāvādī musāvādappaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedeti. Musāvādā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Musāvādā paṭiviratassa evaṃ taṃ bhayaṃ veraṃ vūpasantaṃ hoti.

5. Yaṃ gahapati surāmerayamajjapamādaṭṭhāyī, surāmerayamajjapamādaṭṭhānappaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedeti. Surāmerayamajjapamādaṭṭhānā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Surāmerayamajjapamādaṭṭhānā paṭiviratassa evaṃ taṃ bhayaṃ veraṃ vūpasantaṃ hoti. Imāni pañca bhayāni verāni vūpasantāni honti. Hoti.

Katamehi catūhi sotāpattiyaṅgehi samannāgato hoti.

6. Idha gahapati ariyasāvako buddhe aveccappasādena samannāgato hoti: itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathī satthā devamanussānaṃ buddho bhagavā'ti.

7. Dhamme aveccappasādena samannāgato hoti. 'Svākkhāto bhagavatā dhammo sandiṭṭhiko akāliko ehipassiko opanayiko paccattaṃ veditabbo viññūhī' ti.

1. Parāyaṇoti machasaṃ

[BJT Page 460]

8. Saṅghe aveccappasādena samannāgato hoti. 'Supaṭipanno bhagavato sāvakasaṅgho ujupaṭipanno bhagavato sāvakasaṅgho ñāyapaṭipanno [PTS Page 407] bhagavato sāvakasaṅgho sāmīcipaṭipanno bhagavato sāvakasaṅgho, yadidaṃ cattāri purisayugāni aṭṭhapurisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā'ti.

9. Ariyakantehi sīlehi samannāgato hoti, akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṃvattanikehi. Imehi catūhi sotāpattiyaṅgehi samannāgato hoti.

Yato kho gahapati ariyasāvakassa imāni pañcabhayāni verāni vūpasantāni honti, imehi catūhi sotāpattiyaṅgehi samannāgato hoti, so ākaṅkhamāno attanāva attānaṃ byākareyya: khīṇanirayomhi khīṇatiracchānayoni khīṇapettivisayo khīṇaapāyaduggativinipāto sotāpannohamasmi avinipātadhammo niyato sambodhiparāyanoti.

9. 1. 3. 8

Dutiyaverabhaya suttaṃ

(Sāvatthinidānaṃ)

Yato kho gahapati ariyasāvakassa pañca bhayāni verāni vūpasantāni honti. Catūhi ca sotāpattiyaṅgehi samannāgato hoti. So ākaṅkhamāno attanāva attānaṃ byākareyya: khīṇanirayomhi khīṇatiracchānayoni khīṇapettivisayo khīṇaapāyaduggativinipāto sotāpannohamasmi avinipātadhammo niyato sambodhiparāyano.

Katamāni pañca bhayāni verāni vūpasantāni honti:

1. Yaṃ gahapati pāṇātipātī pāṇātipātappaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedeti. Pāṇātipātā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Pāṇātipātā paṭiviratassa evaṃ taṃ bhayaṃ veraṃ vūpasantaṃ hoti.

2. Yaṃ gahapati adinnādāyī adinnādānapaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedetī. Adinnādānā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Adinnādānā paṭiviratassa evaṃ taṃ bhayaṃ veraṃ vūpasantaṃ hoti.

3. Yaṃ gahapati kāmesu micchācārī kāmesu micchācārappaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedetī. Kāmesumicchācārā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Kāmesumicchācārā paṭiviratassa evaṃ taṃ bhayaṃ veraṃ vūpasantaṃ hoti.

4. Yaṃ gahapati musāvādī musāvādappaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedetī. Musāvādā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Musāvādā paṭiviratassa evaṃ taṃ bhayaṃ veraṃ vūpasantaṃ hoti.

5. Yaṃ gahapati surāmerayamajjapamādaṭṭhāyī, surāmerayamajjapamādaṭṭhānappaccayā diṭṭhadhammikampi bhayaṃ veraṃ pasavati, samparāyikampi bhayaṃ veraṃ pasavati, cetasikampi dukkhaṃ domanassaṃ paṭisaṃvedetī. Surāmerayamajjapamādaṭṭhānā paṭivirato neva diṭṭhadhammikampi bhayaṃ veraṃ pasavati, na samparāyikampi bhayaṃ veraṃ pasavati, na cetasikampi dukkhaṃ domanassaṃ paṭisaṃvedeti. Surāmerayamajjapamādaṭṭhānā paṭiviratassa evaṃ taṃ bhayaṃ veraṃ vūpasantāni hoti.

Katamehi catūhi sotāpattiyaṅgehi samannāgato hoti.

6. Idha gahapati ariyasāvako buddhe aveccappasādena samannāgato hoti: itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathī satthā devamanussānaṃ buddho bhagavā'ti.

7. Dhamme aveccappasādena samannāgato hoti. 'Svākkhāto bhagavatā dhammo sandiṭṭhiko akāliko ehipassiko opanayiko paccattaṃ veditabbo viññūhī' ti.

8. Saṅghe aveccappasādena samannāgato hoti. 'Supaṭipanno bhagavato sāvakasaṅgho ujupaṭipanno bhagavato sāvakasaṅgho ñāyapaṭipanno bhagavato sāvakasaṅgho sāmīcipaṭipanno bhagavato sāvakasaṅgho yadidaṃ cattāri purisayugāni aṭṭhapurisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā'ti.

9. Ariyakantehi sīlehi samannāgato hoti, akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṃvattanikehi. Imehi catūhi sotāpattiyaṅgehi samannāgato hoti.

[BJT Page 462]

Yato [PTS Page 408] kho gahapati ariyasāvakassa imāni pañcabhayāni verāni vūpasantāni honti, imehi catūhi sotāpattiyaṅgehi samannāgato hoti, so ākaṅkhamāno attanāva attānaṃ byākareyya: khīṇanirayomhi khīṇatiracchānayoni khīṇapettivisayo khīṇaapāyaduggativinipāto sotāpannohamasmi avinipātadhammo niyato sambodhiparāyanoti.

[BJT Page 462]

9. 1. 3. 9

Āghātavatthu suttaṃ

(Sāvatthinidānaṃ)

Nava imāni bhikkhave āghātavatthūni, katamāni nava:

Anatthaṃ me acarīti āghātaṃ bandhati. Anatthaṃ me caratīti āghātaṃ bandhati, anatthaṃ me carissatīti āghātaṃ bandhati.

Piyassa me manāpassa anatthaṃ acarīti āghātaṃ bandhati. Piyassa me manāpassa anatthaṃ caratīti āghātaṃ bandhati, piyassa me manāpassa anatthaṃ carissatīti āghātaṃ bandhati.

Appiyassa me amanāpassa atthaṃ acarīti āghātaṃ bandhati. Appiyassa me amanāpassa atthaṃ caratīti āghātaṃ bandhati, appiyassa me amanāpassa atthaṃ carissatīti āghātaṃ bandhati. Imāni kho bhikkhave nava āghātavatthūnīti.

9. 1. 3. 10

Āghātapaṭivinaya suttaṃ

(Sāvatthinidānaṃ)

Nava ime bhikkhave āghāta paṭivinayā, katame nava:

Anatthaṃ me acari taṃ kutettha labbhāti āghātaṃ paṭivineti, anatthaṃ me carati taṃ kutettha labbhāti āghātaṃ paṭivineti, anatthaṃ me carissati taṃ kutettha labbhāti āghātaṃ paṭivineti.

Piyassa me manāpassa anatthaṃ acari taṃ kutettha labbhāti āghātaṃ paṭivineti, piyassa me manāpassa anatthaṃ carati taṃ kutettha labbhāti āghātaṃ paṭivineti, piyassa me manāpassa anatthaṃ [PTS Page 409] carissati taṃ kutettha labbhāti āghātaṃ paṭivineti.

Appiyassa me amanāpassa atthaṃ acari taṃ kutettha labbhāti āghātaṃ paṭivineti. Appiyassa me amanāpassa atthaṃ carissati. Taṃ kutettha labbhāti, āghātaṃ paṭivineti, ime kho bhikkhave nava āghātapaṭivinayāti.

[BJT Page 464]

9. 1. 3. 11

Anupubbanirodha suttaṃ

(Sāvatthinidānaṃ)

Nava ime bhikkhave anupubbanirodhā, katame nava

Paṭhamaṃ jhānaṃ samāpannassa kāmasaññā niruddhā hoti. Dutiyaṃ jhānaṃ samāpannassa vitakkavicārā niruddhā honti. Tatiyaṃ jhānaṃ samāpannassa pīti niruddhā hoti. Catutthaṃ jhānaṃ samāpannassa assāsapassāsā niruddhā honti. Ākāsānañcāyatanaṃ samāpannassa rūpasaññā niruddhā hoti. Viññāṇañcāyatanaṃ samāpannassa ākāsānañcāyatana saññā niruddhā hoti, ākiñcaññāyatanaṃ samāpannassa viññāṇañcāyatanasaññā niruddhā hoti. Nevasaññānāsaññāyatanaṃ samāpannassa ākiñcaññāyatanasaññā niruddhā hoti. Saññāvedayitaṃ nirodhaṃ samāpannassa saññā ca vedanā ca niruddhā honti. Ime kho bhikkhave nava anupubbanirodhāti.

Sattāvāsavaggo tatiyo

Tatruddānaṃ:

Ṭhānabaluṅkā taṇhā ca sattapaññā sīlāyupo,
Dve verā ca dve āghātāni, anupubbanirodhena cāti.