>

Home Page     Next Vagga

19. Dhammaṭṭhavaggo

[BJT Page 88] [\x 88/]
[PTS Page 073] [\q 73/]

E1    E2    P2  256. Na tena hoti dhammaṭṭho ~ yenatthaṃ sahasā naye,
                     Yo ca atthaṃ anatthañ-ca ~ ubho niccheyya paṇḍito,

E1    E2    P2  257. Asāhasena dhammena ~ samena nayatī pare,
                     Dhammassa gutto medhāvī ~ dhammaṭṭho ti pavuccati.

E1    E2    P2  258. Na tena paṇḍito hoti ~ yāvatā bahu bhāsati,
                     Khemī averī abhayo ~ paṇḍito ti pavuccati.

E1    E2    P2  259. Na tāvatā dhammadharo ~ yāvatā bahu bhāsati,
                     Yo ca appam-pi sutvāna ~ dhammaṃ kāyena passati,
                     Sa ve dhammadharo hoti ~ yo dhammaṃ nappamajjati.

E1    E2    P2  260. Na tena thero hoti ~ yenassa palitaṃ siro,
                     Paripakko vayo tassa ~ moghajiṇṇo ti vuccati.

[BJT Page 90] [\x 90/]

E1    E2    P2  261. Yamhi saccañ-ca dhammo ca ~ ahiṃsā saṃyamo damo,
                     Sa ve vantamalo dhīro ~ thero iti pavuccati.

[PTS Page 074] [\q 74/]

E1    E2    P2  262. Na vākkaraṇamattena ~ vaṇṇapokkharatāya vā
                     Sādhurūpo naro hoti ~ issukī maccharī saṭho.

E1    E2    P2  263. Yassa cetaṃ 1 samucchinnaṃ ~ mūlaghaccaṃ samūhataṃ
                     Sa vantadoso medhāvī ~ sādhurūpo ti vuccati.

E1    E2    P2  264. Na muṇḍakena samaṇo ~ abbato alikaṃ bhaṇaṃ
                     Icchālobhasamāpanno ~ samaṇo kiṃ bhavissati.

E1    E2    P2  265. Yo ca sameti pāpāni, ~ aṇuṃ-thūlāni sabbaso,
                     Samitattā hi pāpānaṃ ~ samaṇo ti pavuccati.

[PTS Page 075] [\q 75/]

E1    E2    P2  266. Na tena bhikkhu 2 hoti ~ yāvatā bhikkhate pare,
                     Vissaṃ dhammaṃ samādāya ~ bhikkhu hoti na tāvatā.

E1    E2    P2  267. Yodha puññañ-ca pāpañ-ca ~ bāhetvā brahmacarīyavā,
                     Saṅkhāya loke carati, ~ sa ce bhikkhū-ti vuccati.

E1    E2    P2  268. Na monena muni hoti ~ mūḷharūpo aviddasu,
                     Yo ca tulaṃ va paggayha ~ varam-ādāya paṇḍito,

[BJT Page 92] [\x 92/]

E1    E2    P2  269. Pāpāni parivajjeti, ~ sa munī tena so muni,
                     Yo munāti ubho loke ~ muni tena pavuccati.

E1    E2    P2  270. Na tena ariyo hoti ~ yena pāṇāni hiṃsati,
                     Ahiṃsā sabbapāṇānaṃ ~ ariyo ti pavuccati.

[PTS Page 076] [\q 76/]

E1    E2    P2  271. Na sīlabbatamattena, ~ bāhusaccena vā pana,
                     Atha vā samādhilābhena, ~ viviccasayanena vā,

E1    E2    P2  272. Phusāmi nekkhammasukhaṃ, ~ aputhujjanasevitaṃ,
                     Bhikkhu vissāsaṃ māpādi ~ appatto āsavakkhayaṃ.

Dhammaṭṭhavaggo ekūnavīsatimo.

 

End Notes

1 Editor's note: BJT prints ce taṃ, printer's error.

2 Editor's note: BJT, bhikkhū, which is also the reading in the commentary, but the grammer demands a singular here.

 

Home Page     Next Vagga