[CPD Classification 2.5.8]
[PTS Vol Th 1 ] [\z Th /] [\f I /]
[BJT Vol Th 1 ] [\z Th /] [\w I /]
[PTS Page 062  [\q  62/]     11. 1. 1]
[BJT Page 164] [\x 164/]
Theragāthāpāḷi
Nidānagāthā

Namo tassa bhagavato arahato sammāsambuddhassa


11. Ekādasanipāto.

597. Kiṃ tavattho vane tāta ujjuhāno va pāvuse,
Verambā ramaṇīyā te paviveko hi jhāyinaṃ.

598. Yathā abbhāni verambo vāto nudati pāvuse,
Saññā me abhikīranti vivekapaṭisaññutā.

599. Apaṇḍaro aṇḍasambhavo sīvathikāya niketavāriko,
Uppādayātava me satiṃ sandehasmiṃ1 virāganissitaṃ.

600. Yaṃ ca aññe na rakkhanti yo ca aññe na rakkhati,
Sa ve bhikkhu sukhaṃ seti kāmesu anapekkhavā.

601. Acchodikā puthusilā gonaṅgulamigāyutā,
Ambusevālasañchannā te selā ramayanti maṃ.

602. Vasitaṃ me araññesu kandarāsu guhāsu ca,
Senāsanesu pantesu vāḷamiganisevite.

603. Ime haññantu vajjhantu dukkhaṃ pappontu pāṇino.
Naṅkappaṃ nābhijānāmi anariyaṃ dosasaṃhitaṃ.

604. Pariciṇṇo mayā satthā kataṃ buddhassa sāsanaṃ,
Ohito garuko bhāro bhavanetti samūhatā.

605. Yassa catthāya pabbajito agārasmānagāriyaṃ,
So me attho anuppatto sabbasaññojanakkhayo.

606. Nābhinandāmi maraṇaṃ nābhinandāmi jīvitaṃ,
Kālaṃ ca paṭikaṅkhāmi nibbisaṃ bhatako yathā.

607. Nābhinandāmi maraṇaṃ nābhinandāmi jīnitaṃ,
Kālaṃ ca paṭikaṅkhāmi sampajāno patissato'ti.

Itthaṃ sudaṃ āyasmā saṅkicco thero gāthāyo abhāsitthā'ti.

Saṅkiccattheragāthā.

Tassuddānaṃ:
Saṅkiccathero eko'va katakicco anāsavo,
Ekādasanipātamhi gāthā ekādaseva cā'ti.

Ekādasanipāto niṭṭhito.

1 Sandehasa-[PTS.]